सांसी लघु संदेश

मुसिबत आणैं पर हम क्या करते हाँ?
मेरे प्यारे भाई-बाहणों, हम जितने भी लोक इस दुनिया म रैहते हाँ, म्हारै माहला हर एक इन्सान किसी ना किसी मुसिबता का साम्हणा आये दिन करता है, काइं मुसीबतां बड़ियाँ होतियाँ हैं, तो काइं छोटियाँ, याह म्हारै पर ही होत्ता है। जिद कोइ भी म्हारै पर मुसिबत आत्ती है, तो हम सारे ही घबराई जात्ते हाँ, कि इबकै हूँ क्या करंगड़ा। अर उसी वक्त हम उन मुसिबतैं थ बाहर निकळणैं का कोइ हल लाभणैं लाग्गी जात्ते हाँ, मुसिबत म्हारीया जिन्दगीया म कई तरीक्के थ आतियाँ हैं, जिदाकी पैसे कि तंग्गी, काम्मा कि तंग्गी, पढ़ाइय्या म कमज़ोर रैहणा, परीवारा कु सम्हाळणा, बच्चैं कि पढ़ाई करवाणा, वगैरा।

पर इबकै सवाल याह आवता है, कि “मुसिबत आणैं पर हम क्या करते हाँ? 

क्या हम म्हारीयैं जिम्मेदारीयैं थ भाजते हाँ, याह फेरी मुसिबतैं का साम्हणा करते हाँ? 

दुनिया म हम घणे ऐस्से लोक्कैं कु म्हारै आस्सै-पास्सै देखते हाँ, जो आपकिया जिन्दगीया म सफल हैं, शायद वो डरे कोइन या फेरी उसी मुसीबता म टिके रहे, अर मैहनत करी, काम करनै म आळस कोइन करया, दुसरैं कियैं बात्तैं पर ध्यान कोइ दिया, या फेरी आपका मकसद कोइ भुल्ले जिसकिया वज़ाह थ वो सफल होये होंग। अर एक आच्छी जिन्दगी जिव्या करते हैं, पर याद राक्खो उस सफलता कु जीतणैं वास्तै उनूर भी कई मुसिबतैं का साम्हणा करया अर हार कोई मान्नी इसकरी वो आज आपकिया जिन्दगीया म सफल हैं, अर एक आच्छी जिन्दगी जिव्या करते हैं।
इसी तरीक्के थ हम याह बात याद राख्खा कि अगर हम किसी भी मुसिबत याह परेशानिया कु देख्या करते हाँ, तो हम उसका साम्हणा करना सिख्खाँ, अर म्हारीया जिम्मेदारीयैं थ हम ना भाज्जाँ, अगर हम मुसिबतैं थ या जिम्मेदारीयैं थ भाजते हाँ, तो इसका मतलब कि हम डरी चुक्के हाँ, अर म्हारैं म हिम्मत कोइन, इस वजह थ हम जिन्दगीया के कई पड़ावैं म हारोड़े होत्ते हाँ।
इब मेरे भाई बाहणों, हम म्हारे हालात्तैं या मुसिबतैं का पूरीया हिमता थ साम्हणा कराँ अर म्हारीयैं म्मेदारीयैं थ भाजणैं क वजाये उनका साम्हणां कराँ, ताकी हम लोक्कैं किया नज़री माह हारोड़े नाही पर एक सफल इन्सान्ना के रुप्पा म अपणे-आप्पा कु साबित करी सकाँ।